Бүген Казанда Икенче Бөтенроссия балалар фольклориадасы ачылды. Фестиваль кунакларын һәм катнашучыларны Дәүләт Советы Рәисе, Татарстан халыклары Ассамблеясе Рәисе Фәрит Мөхәммәтшин сәламләде. Бу турыда Татарстан Дәүләт Советы матбугат хезмәте хәбәр итте.
Балалар халык иҗаты фестивалендә Россиянең 80 төбәгеннән меңнән артык катнашучы бар. Алар – традицияләрне саклаучы яшьләр, фольклор, хореография, халык-җыр һәм инструменталь ансамбльләр артистлары.
Парламент башлыгы билгеләп үткәнчә, Татарстанда 175 милләт вәкилләре тату һәм дус яши, шуңа күрә әлеге вакыйганың республика башкаласында узуы очраклы түгел. «Бездә гореф-гадәтләрне саклау, рухи мәдәниятне үстерү һәм барлык халыкларның туган телен өйрәнү өчен тигез мөмкинлекләр тудырылган. Мәдәниятләрнең күптөрлелеге – сакларга кирәк булган зур иҗади потенциалга ия уникаль байлык. Нәкъ менә Бөтенроссия балалар фольклориадасы үсеп килүче буынны сәнгатебез традицияләрен өйрәнү, саклау һәм үстерү, чын шәхес тәрбияләү теләгендә берләштерә. Сезнең ярдәмендә без тагын бер тапкыр җиребезнең шундый күпкырлы талантларга бай булганына инанабыз», – диде ул.
Фәрит Мөхәммәтшин Фольклориаданың иҗади үсеш һәм хезмәттәшлек өчен яңа горизонтлар ачасына, яңа очрашулар һәм дуслар бүләк итәчәгенә ышаныч белдерде. Ул Россия Федерациясе Президенты Владимир Путинның сәламләвен ирештерде.
«Безнең уникаль тарихи, мәдәни, рухи мирасыбызга сакчыл караш – дәүләтнең төп өстенлекләренең берсе. Халык сәнгате заманнар һәм буыннар бәйләнешен саклый, кешедә Ватанга мәхәббәт, милли гореф-гадәтләргә һәм йолаларга хөрмәт тәрбияли. Шуңа күрә сезнең искиткеч проектыгызның ел саен илнең төрле төбәкләреннән килгән талантлы яшьләребезне берләштерүе, яшь катнашучылар өчен чын дуслык һәм иҗади бердәмлек бәйрәменә әверелүе сөендерә. Чын күңелдән башкарылган җырлар, фольклор, бию, хор коллективлары чыгышлары беркемне дә битараф калдырмас һәм барлык артистлар һәм тамашачылар тарафыннан озак вакыт истә калачак дип ышанам», – диде ул.
Фестивальне ачу тантанасында Татарстан Республикасы мәдәният министры Ирада Әюпова, В.Д. Поленов исемендәге Россия Дәүләт халык иҗаты йорты директоры, ЮНЕСКО эшләре буенча РФ Комиссиясе каршындагы Матди булмаган мәдәни мирасны саклау буенча Россия комитеты рәисе Тамара Пуртова катнашты.
«Фольклориада – Россия Президенты Владимир Путин игълан иткән гаилә елының төп мәдәни вакыйгаларының берсе. Бу вакыйганың Татарстанда узуы символик, анда халык һәм гаилә традицияләрен хөрмәт итәләр, төбәктә яшәүче барлык халыкларның мәдәниятен саклыйлар һәм үстерәләр», – дип билгеләп үтте Тамара Пуртова.
Быел фестиваль кысаларында эксперт бәяләмәсенә 128 ансамбльдән һәм 35 солисттан 163 видеопрограмма килгән. Алдан сайлап алу нәтиҗәсендә фольклориадада катнашу өчен 71 балалар-яшүсмерләр коллективы (фольклор, хореография, инструменталь), 4 дуэт һәм 10 яшьтән 18 яшькә кадәрге 13 солист-җырчы чакырылган.
Фольклориаданың төп бурычлары – матди булмаган этномәдәни байлыкны саклау, үсеп килүче буында борынгы традицияләргә һәм гореф-гадәтләргә хөрмәт һәм горурлык тәрбияләү, балалар һәм яшьләр фольклор хәрәкәтен үстерү.
Фестиваль Татарстан шәһәрләрендә һәм районнарында 23 июньгә кадәр узачак. Фольклориада кысаларында иҗади очрашулар, күчмә концертлар, бәйрәм костюмлы йөреше, флешмоб – «Халыклар дуслыгы» әйлән-бәйләне планлаштырылган.