Татарстанда күп балалы гаиләләр саны соңгы ун елда 24 меңнән 50 меңгә кадәр арткан. Бүген ТР хезмәт, халыкны эш белән тәэмин итү һәм социаль яклау министры Эльмира Зарипова ТР Төбәк белән идарә итү үзәгендәге туры эфирда шул хакта хәбәр итте.
«Россия Президенты указы белән быел бөтен ил күләмендә күп балалы гаиләнең бердәм статусы билгеләнде. Бу өч һәм аннан да күбрәк баласы булган һәм олы баласы 18 яшьтән узмаган гаилә. Ләкин әгәр ул (олы бала - Т-и иск.) көндезге бүлектә укый һәм аңа 23 яшьтән дә артык түгел икән, гаилә күп балалы дип санала», - диде ул.
Спикер билгеләп үткәнчә, законнардагы үзгәрешләрне исәпкә алып, Татарстанда күп балалы гаиләләр саны 70 меңгә җитәчәк.
Зарипова китергән мәгълүматлар буенча, республикада күп балалы гаиләләр өчен төрле ташламалар каралган. Бу - торак-коммуналь хезмәтләр өчен түләү чыгымнарының 30 проценты күләмендә субсидия, алты яшькә кадәрге балаларга дару алу өчен субсидияләр һәм укучы балаларга транспортта йөргән өчен субсидияләр. Шулай ук Татарстанда тәрбиягә бала алган күп балалы гаиләләр социаль ярдәм чараларыннан файдалана.
«Татарстанда күп балалы гаиләләр өчен ташламалар - демографик чара, алар мөлкәтне һәм акча керемнәрен исәпкә алмыйча бирелә», - дип искәртте Зарипова.
2023 елның 22 ноябрендә РФ Президенты Владимир Путин имзалаган указ нигезендә 2024 ел Россиядә Гаилә елы дип игълан ителде. Документта билгеләп үтелгәнчә, карар гаиләне яклау һәм традицион кыйммәтләрне саклау өлкәсендә дәүләт сәясәтен популярлаштыру максатыннан кабул ителгән. Баласы булган һәм бала табарга җыенган гаиләләргә ярдәм итү өчен «Демография» илкүләм проекты гамәлгә ашырыла, федераль һәм төбәк дәрәҗәсендә комплекслы ярдәм системасы эшли.