Чирмешәндә Фаяз Минһаҗевның шәхси музеенда ниләр генә юк. Эчке эшләр ветераны тарих почмагын үз гаражында ясаган. Бу хакта «Безнең Чирмешән» сайтында Лилия Зөфәрова яза.
Күптән түгел якташыбызның әлеге музеена «Чишмәкәй» балалар бакчасында тәрбияләнүчеләр килде. Монда импровизацияләнгән музей киштәләрендә гасырлы тарихы булган әйберләр: самавыр, күмер үтүкләре, көнкүреш әйберләре, төрле савыт-саба, радио җиһазлары, магнитофоннар һәм фотоаппаратлар бар. Хәтта Ленин бюстына да урын табылган. Экспонатлар балаларда гына түгел, өлкәннәрдә дә кызыксыну уята.