Быел Магнитогорскиның «Сәхия» мәчете каршындагы мәдрәсә балалар өчен җәйге мәгърифәтчелек-сәламәтләндерү мөселман лагере оештырган. Бу хакта Россия мөселманнары Диния нәзарәте хәбәр итә.
Лагерь 3 июньдә башланган. 10 көн дәвамында мөселман гаиләләреннән малай һәм кызлар дини белем алган. Укыту спорт дәресләре һәм экскурсияләр белән чиратлаштырып алып барылган. Лагерь кысаларында спорт һәм интеллектуаль ярышлар, викториналар, рәсем сәнгатенең гамәли төрләре буенча дәресләр үткәрелгән. Балалар шәһәр паркларындагы аттракционнарда һәм шәһәр читендә урнашкан Динопаркта булган. Кызлар һәм малайлар өчен өч тапкыр туклану тәэмин ителгән.
Җәйге лагерьның соңгы көнендә «Сәхия» мәчете имамы Ильяс Гафаров дини викторина үткәргән, укучыларны бүләкләгән һәм җәйге каникул башлану белән котлаган.
«Көзен балаларыбызны түземсезлек белән мәдрәсәдә дәресләргә көтеп калабыз. Җәй дәвамында алар барысы да үсеп, тирә-юньдәге дөнья һәм Аллаһның иҗатын өйрәнүдә тагын да активлашып килерләр, дип өметләнәбез», - дип билгеләп үтте Ильяс Гафаров, яшь мөселманнарга үгет-нәсихәт биреп.
Ул лагерьны оештыручыларга, бәйрәм өстәле һәм сыйлары өчен ата-аналарга рәхмәт белдерде. Балалар белән көн саен квалификацияле педагоглар – Әминә Нәҗмиева, Асия Шмакова һәм мәдрәсә мөдире Альбина Гафарова шөгыльләнде, ә тәмле һәм сәламәт ризыкларны аш-су остасы Таскирә Ишбулдина әзерләде, дип билгеләп үтте имам.
