Яңа салым системасы җәй ахырына кадәр кабул ителәчәк. Якынча, бу августта булачак. Бу хакта Россия Президенты Владимир Путин Ерак Көнчыгыш халкы белән очрашуда белдерде.
Бу вакытка барлык төзәтмәләр хөкүмәт һәм Дәүләт Думасы тарафыннан тулысынча эшкәртелергә тиеш, ә аннары кабул ителәчәк, дип сөйләде Россия лидеры.
Дәүләт башлыгы өстәвенчә, Финанс министрлыгы мәгълүматлары буенча, керемгә салымның (НДФЛ) артуы салым түләүчеләрнең нибары якынча 3,2 процентына кагылачак.
Искәртик, керемгә салымның киңәйтелгән прогрессиясен май ахырында тәкъдим иттеләр.
Яңа система нигезендә, керемгә салымның 13 процент ставкасы еллык керем 2,4 млн сумга кадәр булганда калачак, ә керемнәр күтәрелгәндә, россияле елына 50 млн сумнан артык акча алган очракта әкренләп максималь 22 процентка кадәр үсәчәк. Өстәмә салымны бөтен суммадан түгел, ә арткан күләмнән генә түләргә кирәк була. Яңалык махсус операциядә катнашучыларга һәм үзмәшгульләргә кагылмаячак.
