Татарстан Җир ресурслары һәм җир реформасы дәүләт комитетының элеккеге башлыгы вафат
ТАССР Югары советының ХІ чакырылыш (1985-1990 еллар) депутаты Александр Ефремов 84 яшендә кинәт вафат булган. Ул 10 ел дәвамында Татарстанның Җир ресурслары һәм җир реформасы буенча дәүләт комитетын, 2 ел дәвамында – ТР буенча Җир кадастр палатасын җитәкләде. Бу хакта ТР Җир һәм мөлкәт мөнәсәбәтләре министрлыгы сайтында хәбәр итәләр.
«А. А. Ефремов җитәкчелегендә Татарстан Республикасы җир ресурсларын инвентаризацияләү буенча масштаблы эш башкарылды, шул исәптән аэрофототөшерү кулланып инвентаризацияләү үткәрелде. Аның нәтиҗәләре Татарстан Республикасында җир кишәрлекләрен заманча кадастр исәбенә алу нигезенә салынды. А. А. Ефремов җир реформасын гамәлгә ашыру мәсьәләләренә аерым игътибар бирде. Россия Федерациясендә беренчеләрдән булып республиканың авыл халкы авыл хуҗалыгы җирләренә өлеш ияләре булды», — дип билгеләп үттеләр министрлыкта.
Александр Ефремов 1940 елның 14 сентябрендә Буа шәһәрендә туган. Үзенең хезмәт эшчәнлеген 1957 елда токарь өйрәнчеге буларак башлый. 1964 елда Максим Горький исемендәге Казан авыл хуҗалыгы институтын тәмамлый. Совет армиясендә хезмәт итә.
1966-1978 елларда мелиорация системасында эшли, 1978-1991 елларда Апас районы Халык депутатлары советы башкарма комитеты рәисе, КПССның Кама Тамагы район комитетының икенче һәм беренче секретаре, ТАССР Министрлар Советы эшләре идарәсе бүлегенең баш референты вазифаларында партия һәм дәүләт эшендә эшли.
1991 елдан 2001 елга кадәр ТР Җир ресурслары һәм җир реформасы буенча дәүләт комитетын җитәкли. 2001 елдан 2003 елга кадәр Татарстан Республикасы буенча җир кадастры хезмәтен, «Татарстан Республикасы буенча җир кадастры палатасы» федераль дәүләт учреждениесен җитәкли.
Гражданнар панихидасы 19 июньдә, 09.30 сәгатьтә, 7 номерлы шәһәр клиник хастаханәсе моргының матәм залында узачак.