Татарстан Республикасы Рәисе Рөстәм Миңнеханов Әлмәткә эш сәфәре кысаларында Корбан гаете уңаеннан бәйрәм намазында катнашты. Намаз Ризаэтдин Фәхретдин исемендәгн яңартылган үзәк мәчеттә узды. Бу турыда Татарстан Рәисенең матбугат хезмәте хәбәр итте.
Мәчет соңгы берничә елда тулысынча реконструкцияләнгән. Бүген бәйрәм көнендә мәчет Әлмәт мәхәлләсе кешеләре өчен ишекләрен ачты. Татарстан мөфтиенең беренче урынбасары Илфар хәзрәт Хәсәнов мөселманнарны Корбан бәйрәме белән котлады һәм Россия Президенты Владимир Путин һәм Татарстан Рәисе Рөстәм Миңнеханов котлауларын укыды.
Илфар Хәсәнов үз вәгазен гаилә темасына, ир белән хатынның никахтагы мөнәсәбәтләренә багышлады. Ул ассызыклаганча, ислам җәмгыятендә гаилә институты зур әһәмияткә ия. Ир белән хатынның авырлыкларына карамастан, никах һәм гаилә кыйммәтләрен саклап калу бик мөһим.
Бәйрәм намазынан соң җыелганнарга Татарстан Рәисе мөрәҗәгать итте. Ул Әлмәтнең яңартылган мәчете чын мөселман дини-агарту үзәгенә әверелүен ассызыклады. «Бу мәчет - Татарстан өчен генә түгел, бөтен Россия өчен үрнәк. Бу чын ислам үзәге. Алга таба янәшәдә урнашкан мәдрәсә бинасын яңарту планлаштырыла. Мәчетне ремонтлауда катнашкан, бу игелекле эшкә үз өлешен керткән барлык кешеләргә рәхмәт белдерәм. Татарстанда барлык диннәргә дә тиешле игътибар бирелә. Тынычлыкта һәм татулыкта без матур республикабызда, бөек илебездә яшибез», - диде Татарстан Рәисе.
Шулай ук Әлмәт кафедраль соборы руханиы Олег Чугунов мәчет ачылышына махсус чакырылган мөселманнарны бәйрәм белән котлады. «Һәр гыйбадәтханә, һәр мәчет - ул Аллаһ йорты. Аллаһ өчен гамәл кылган кешеләрнең бернәрсәгә дә кызганмавын күрү бик яхшы. Бу матур объектның кеше җанын коткару үзәге булуын телим. Барысын да шәһәр өчен дә, республика өчен дә әһәмиятле булган бу вакыйга белән котлыйм», - дип өстәде ул.
Аннары Рөстәм Миңнеханов мәчетнең яңартылган комплексын карады. 1995 елда төзелгән мәчет бинасы реконструкциягә мохтаҗ булган. 2021 елда «Татнефть» ГАҖ мәчетне яңарту һәм аның функционалын киңәйтү проектын килештерде. Мәчетнең фасады заманча стильдә, төнлә урамны яктыртучылар белән башкарылган. Мәчетнең гөмбәзе 2 метр биеклектә ясалган. Тирә-якта «Күлләр каскады» белән тоташтырылган йөрү зонасы төзекләндерелгән.
Яңартылган мәчет бинасы үз эченә никах һәм исем кушу өчен бүлмәләр, китапханә, конференцияләр залы, күргәзмә киңлеге, кибет, гаилә һәм балалар уен зоналарын ала. Намаз залының мәйданы 1200 кешегә элеккечә кала. Шул ук вакытта мәдрәсә аерым өч катлы бинага күчкән, диелә хәбәрдә.
