Татарстан Республикасы Рәисе Рөстәм Миңнеханов Петербург халыкара икътисади форумы кысаларында Татарстан Республикасында өстәл теннисын үстерү турында килешү имзалауда катнашты. Бу хакта «Татар-информа»га ТР Рәисенең матбугат хезмәте җитәкчесе Лилия Галимова хәбәр итте.
Документ «Россия өстәл теннисы федерациясе» гомумроссия физкультура-спорт иҗтимагый оешмасы белән имзаланган.
Бүгенге көндә республиканың 20 спорт мәктәбе һәм Казан олимпия резервы училищесында теннис белән 1801 спортчы шөгыльләнә. Осталыкны үстерү өчен кирәкле шартлар тудыру, шулай ук төрле дәрәҗәдә ярышлар оештыру өчен республикада махсуслаштырылган 5 спорт залы төзү мәсьәләсе карала. Аларны Агерҗе, Апас, Баулы, Саба һәм Ютазы районнарында төзү планлаштырыла.
Россия Федерациясе өстәл теннисы федерациясе төзелешне финансларга әзер.
