Башкортстан татарлары конгрессы «ВКонтакте» челтәрендәге сәхифәсендә июль аенда Башкортстан татар яшьләре форумы оештырырга җыенулары турында хәбәр итте.
Киләчәк яшьләр кулында! Халкыбызнең киләчәген кайгыртып, тел, гореф-гадәт, милли үзаңны саклау максатыннан Ватаныбызга хезмәт итүне үзләренә максат итеп куйган яшь буын вакилләре өчен июль аенда Башкортостан татар яшьләре форумы үткәрелергә планлаштырылды», диелә бу хәбәрдә.
Проектны чынга ашыру һәм бу проектка кагылышлы бар булган фикерләр белән бүлешү өчен, уртак бер концепцияне кору өчен утырыш үткәрелгән.
«Очрашу бик фәхемле булды. Башкортстан татарлары конгрессының җитәкчесенең урынбасары Зәлия Ахунова бүгенге көндә татар яшьләре нәрсә дип яши, аларны нәрсә кызыксындыра, аларга форумда нинди формат кызыклы булганын тыңлады. Яшьләрнең чыннан да фикерләре дә башка төрле, бик кызыклы утырыш булды. Күпме фикер, күпме яңа мәгълүмат теркәлеп барды. Башкортстан татар яшьләре көннәрен үткәрү өчен оештыру комететы да барланды», дип яза Айгөл Рамазанова.
