Татарстан Республикасы вице-премьеры – Татарстанның Россия Федерациясендәге Тулы вәкаләтле вәкиле Равил Әхмәтшин Россиянең халык артисты Олег Газмановка армия генералы Мәхмүт Гәрәевнең 100 еллыгына багышлап чыгарылган истәлекле медальне тапшырды. Бу хакта Тулы вәкаләтле вәкиллекнең матбугат хезмәте хәбәр итә.
Тулы вәкаләтле вәкиллектә Газманов Әхмәтшинга яңа җырының әзер язмасын тыңлатты. Җырның текстын ул апрель аенда «Мәскәү — Татарстан күпере» IX Мәскәү яшьләр форумында укыды. Композиция илнең күпмилләтле халкы Ватанга карата кичергән мәхәббәткә багышлана. Шул вакытта Газманов бу җырны киләсе елда форумда башкарырга һәм татар телендә сәламләү сүзләре өйрәнергә вәгъдә иткән иде.
Җыр текстында түбәндәге юллар бар:
«Я — русский, я — татарин, я — чеченец, я — башкир, / Я всей страны народ, и мы все вместе русский мир! / Буряты и евреи, дагестанцы, ингуши — / Все те, кто здесь родился и кто Родину нашли».
Тулы вәкаләтле вәкил халык артистына «Мәхмүт Гәрәевнең тууына 100 ел» истәлекле медален тапшырды һәм Мәскәүгә Татарстан Мәдәнияте көннәренә чакырды. Традиция буенча бу вакыйга август аена билгеләнгән.