Татар меценаты Сара Садыйкованың нәсел йорты булган Әхмәтша бабай йортына мемориаль такта куярга тели.
Әлеге яңалык белән күренекле татар композиторы Сара Садыйкова һәм белән актер һәм режиссер Газиз Айдарскийның варисы Әлфия Айдарскаяның туган көнендә Татарстан Мәдәният министрлыгының бүлек мөдире, тарихчы галим Айрат Фәйзрахманов уртаклашты.
«Сезнең хатирәләрегез тарихчылар өчен кызыклы чыганак булып тора. Казанның Бишбалта бистәсендә сезнең нәсел йортыгыз булган Әхмәтша бабай йорты исән. Бер меценатыбыз шушы йортка мемориаль такта куярга тели», – диде ул «Шәрыкъ клубы»нда оештырылган туган көн кичәсендә күренекле шәхесне котлаганда.
Сүз татар меценаты Гарәфетдин Хисаметдинов турында бара. Ул Казанның Николай Столяров скверына «Бишбалта осталары» дип аталган скульптур композиция куйдырткан кеше буларак билгеле.
Сара Садыйкованың бабасы Әхмәтша бабай яшәгән йорт Бишбалта бистәсендә сакланган. Ике катлы ныклы бүрәнәдән төзелгән йорт Мәдәни мирас объекты түгел һәм анда бер мемориаль такта да юк.
Әхмәтша бабай тумышы белән Апас районының Тутай авылыннан. Хәзер бу авылда Сара Садыйкованың музее да бар.
