Казан Кремле янында Меңьеллык мәйданында Татарстанның хезмәт династияләрен бүләкләделәр. Тантана 11 майда Зур гаилә яллары кысаларында узды. Бу турыда «Татар-информ» хәбәрчесе Җәмил Сәлимгәрәев яза.
«Хезмәт кешесе – горур яңгырый. Мин безнең хезмәт династияләре вәкилләрен начар һава торышы гына куркытмаячагына ышанган идем», - диде ТР Дәүләт Советы президиумы әгъзасы Елена Кузьмичева сәламләү чыгышында.
ТР Премьер-министры урынбасары Ләйлә Фазлыева Зур гаилә ялларының бер тапкыр гына уза торган проект булмавын искәртте. Республика Хөкүмәте ярдәмендә илдә Россия Президенты Владимир Путин игълан иткән Гаилә елында барлык муниципаль районнарда төрле чаралар оештырылачак.
«Гаилә ялы театрда, саф һавада йөргәндә яки предприятиедә булырга мөмкин. Бәлки Гаилә елында гаилә ялларының корпоратив практикаларын формалаштырырбыз», - диде Фазлыева.
Татарстанда Зур гаилә яллары майдан сентябрьгә кадәр барлык муниципаль районнарда үтә. Казанда ул 11-12 майда, 1-2 июньдә һәм 6-7 июльдә оештырыла. Шул ук вакытта шәһәр музейларында балалы гаиләләр өчен интерактив программалар, квестлар һәм төрле мастер-класслар узачак. Китапханәләрдә китап күргәзмәләре белән танышырга һәм гаилә белән уку клубына килергә мөмкин.
Республика районнарында Зур гаилә яллары 18-19 майда башлана. Әлмәт һәм Чистай районнарында мондый чаралар – 1-2 июньдә һәм 6-7 июльдә, Азнакай районында 18-19 майда һәм 17-18 августта үтәчәк. Чаралар планы белән район сайтларында һәм Татарстанда Гаилә елы порталында танышырга мөмкин.