Татарстан Рәисе Рөстәм Миңнеханов Гвинея-Бисау Президенты Умар Сисоку Эмбалоны майда Россиягә сәфәре вакытында безнең республикага эш сәфәре белән килергә чакырды. Африка лидеры Кызыл мәйданда Җиңү парадында булырга планлаштыра.
«Россиягә сәфәр кысаларында Татарстан потенциалын өйрәнү бик яхшы мөмкинлек! Казанда көтеп калабыз!» - дип язган республика җитәкчесе Телеграм-каналындагы сәхифәсендә.
Искәртик, Татарстан Рәисе кичә Ислам хезмәттәшлеге оешмасы әгъзалары булган дәүләтләр һәм илләрнең хөкүмәт башлыкларының XV юбилей саммитын ачу тантанасында катнашты. Ислам хезмәттәшлеге оешмасы 4 континентта 57 дәүләтне берләштерә һәм Берләшкән милләтләр оешмасыннан соң зурлыгы буенча икенче хөкүмәтара оешма булып тора. Россия берләшмәдә күзәтүче ил булып тора. Халыкара вакыйга кырларында Рөстәм Миңнеханов берничә очрашу үткәрде, шул исәптән Гвинея-Бисау лидеры белән дә сөйләшү булды.