Россия Федерациясе Хөкүмәте 2024 елда Казанда узачак БРИКС илләре Уеннарында Россия җиңүчеләренә һәм призерларына бер тапкыр бирелә торган акчалата бүләкләү турында карар проекты әзерләде.
Спортчыларны акчалата бүләкләүдән тыш, медаль яулаган атлетларны әзерләүне тәэмин иткән Россия спорт җыелма командалары тренерларына һәм белгечләренә призлы түләүләр каралган.
РФнең атказанган тренеры, ТР Иҗтимагый палатасы әгъзасы Ольга Павлова, документ проектына комментарий биреп, спортчыларны гына түгел, тренерлар составын да бүләкләүнең мөһимлеген билгеләп үтте.
«Дәүләтнең спортчылар турында гына түгел, аларны әзерләгән тренерлар турында да кайгыртуы куанычлы. Тренерлар составы чемпионнар белән беррәттән безнең спортның алтын фондын тәшкил итә. Мин Олимпия һәм паралимпия чемпионнары тренерларына пенсиягә өстәмә түләү турындагы законны эшләүчеләрнең берсе һәм тренерларның һәм спортчыларның хокуклары, аларның социаль гарантияләре яклансын өчен барысын да эшлим», — диде Павлова.
БРИКС уеннары Татарстан башкаласында 12-23 июньдә уза. Барлыгы 29 спорт төре буенча 380 комплект медаль уйнатылачак. Халыкара турнир дисциплиналарына беренче билетлар 23 апрельдә, уеннар башланырга 50 көн кала сатыла башлады. Күптән түгел булачак турнирның илчеләре билгеләнде.
