Язгы ташудан зыян күргән Оренбург өлкәсе халкына Әлмәттән 12 тонна гуманитар ярдәм озаттылар. Берничә көн дәвамында шәһәр халкы беренче чираттагы кирәкле әйберләр (өс һәм аяк киемнәре, урын-җир әйберләре, юрган һәм мендәрләр, азык-төлек) китерде.
Моннан тыш, район башлыгы күрсәтмәсе белән 10 тонна эчәргә яраклы су һәм өреп кабартыла торган биш көймә озаттылар.
Оренбург өлкәсендә гадәттән тыш хәл режимы кертелде. Өлкәдә яшәүче күпләр йорт-җирсез һәм акчасыз, гадәти әйберләр һәм уңайлыклардан мәхрүм калды. Бүгенге көндә язгы ташудан зыян күргән һәм ашыгып өйләреннән киткән кешеләрне беренче чиратта кирәкле әйберләр, азык-төлек белән тәэмин итү зарур. Татарстан да моннан читтә калмый.
«Бу эш кирәк булганчы кадәр дәвам итәчәк», - дип искәртте район башлыгы Тимур Нагуманов.
Шәһәр хакимиятендә акциянең дәвам итүен әйттеләр: гуманитар ярдәм 8.00-20.00 сәгатьләрдә түбәндәге адрес буенча кабул ителә: Ленин урамы, 21.
Элегрәк «Татар-информ» агентлыгы су басудан зыян күргән Орскида Россия Гадәттән тыш хәлләр министрлыгының 700дән артык коткаручысы эшләве хакында хәбәр иткән иде. Зыян күрүчеләрне эвакуацияләү, ярдәм итү һәм коткару өчен 50гә якын кеше сыйдырышлы йөзмә транспортерлар, моторлы һәм өреп кабартыла торган көймәләр кулланыла.
Фото, видео: Татарстанның Әлмәт районы матбугат хезмәте.
