«Яңа кешеләр» партиясеннән Дәүләт Думасы вице-спикеры Владислав Даванков чит илгә чыгу тыелган бурычлы кешеләргә штрафларын турыдан туры аэропортта түләргә рөхсәт итү тәкъдиме белән сорау юллады. Бу хакта РИА Новости агентлыгы хәбәр итә.
«Гражданнарга чик буе пунктлары, вокзаллар һәм аэропортларда бурычын тулысынча түләү һәм шунда ук очарга рөхсәт итү мөмкинлеген бирү максатка ярашлы булыр иде дип уйлыйм. Шул рәвешле, гражданнардан әҗәтен түләгәннән соң чикләүләр шунда ук алына», - диелә мөрәҗәгатьтә.
Мөрәҗәгать авторы билгеләп үткәнчә, хәзерге вакытта берничә мәгълүмати система, шул исәптән «Дәүләт хезмәтләре» порталы һәм Суд приставлары федераль хезмәте бар, аларда кешеләр башкарма производстволарның булу-булмавын һәм аларны түләү турында белә ала. Әмма чынлыкта бу системалардагы мәгълүматлар актуаль түгел һәм үзара синхронлаштырылмаган, дип өстәде Даванков.
«Шул рәвешле, практикада мондый хәлләр килеп туа: «Дәүләт хезмәтләре» системасында бурычлар һәм башкарма производстволар чагылыш тапмый, ә чит илгә чыгуны тыю әле тагын бер-ике атна дәвамында гамәлдә була», - диелә мөрәҗәгатьтә.
Моннан тыш, анда билгеләп үтелгәнчә, әгәр кеше бурычын вакытында түләсә, аның «Дәүләт хезмәтләре»ндәге профилендә чит илгә чыгуда чикләүнең булмавы турында мәгълүмат чагылыш тапса һәм шул ук вакытта чынлыкта чик буе пунктларында тыюны гамәлдән чыгару хакында мәгълүмат булмаса, мәгълүмати системалардагы белешмәләрне вакытында актуальләштермәгән Башкарма хакимият органы тарафыннан китерелгән зыянны компенсацияләү мәсьәләсен карарга тәкъдим ителә.
