16 мартта Самара өлкәсенең «Мәктәп» якшәмбе мәктәбе укучылары һәм аларның ата-аналары өчен күмәк ифтар оештырылды. Бу хакта Бөтендөнья татар конгрессының матбугат хезмәте хәбәр итә.
Кичә кунакларын «Мәктәп» мөгаллимәләре сәламләде, ә якшәмбе мәктәбе укучылары Изге Коръәннән аятьләр укыды.
Шуннан соң «Рамазан – йөрәкләрнең эш вакыты» дигән темага лекция булды. Остазбикә Ирина Мөхәммәдова Коръәннең кыйммәтләре хакында сөйләде, шулай ук тематик викторина үткәрде, дөрес җаваплар өчен бүләкләр тапшырды.
Керамика остасы Диләрә Тимербулатова кулдан эшләнгән әйберләрне бүләк сыйфатында тәкъдим итте.
Моннан тыш, яшь мөселманнар Изге Рамазан аена багышланган шигырьләр укыды. Ә «Мәктәп» укучысы Сафия Ногманова бала күзлегеннән чыгып Рамазан турында сөйләде.
Кичәнең барлык кунакларына открыткалар һәм ифтар символы буларак йөрәк рәвешендәге шоколадлар тапшырылды.