Ի աջակցության Արցախի ակցիայի մասնակիցները երթ են անցկացնում Երեւանում
Ի աջակցություն Արցախի ակցիայի մասնակցիներն այսօր հանրահավաք իրականացրին Մյասնիկյանի անվան հրապարակում։ Ակցիայի մասնակիցների ձեռքերին պաստառներ են, որոնց վրա հայերեն, ռուսերեն և անգլերեն գրված է` «Մենք Արցախն ենք», «Բացեք կյանքի ճանապարհը» և այլն։
Ակցիայի սկզբում արցախցի փոքրիկները երգեցին Արցախի օրհներգը։
Ելույթ ունեցավ Լյոկա անունով հայտնի արցախցի ռեպեր Կոլյա Շահգելդյանը։
«Բոլորս մեր պարտքն ենք համարում խմել սահմանին կանգնած տղերքի կենացը։ Ուզում եմ հարց տալ․ Ինչպե՞ս եք կարողանում խմել նրանց կենացը, հարգանքի տուրք մատուցել, բայց րոպեներ հետո ասել՝ «ամեն ինչ որոշված էր մեր փոխարեն, այդպես էլ պետք է լիներ։ Ուզում եք ասել՝ իմ ընկերները զոհվել են հանուն սուտ գաղափարի՞, ուզում եք ասել, որ իմ ընկերների հավատքն առ այն, որ միայն կռվելով կարող ենք մեր երկիրը պահել, սխա՞լ էր, ուզում եք ասել՝ Եռաբլուրի տղերքի պահանջը կարող ենք մերժե՞լ։ Հազարավոր տղերք իրենց կյանքը զոհեցին, որ Արցախում ապրող մանուկները խաղաղ ու երջանիկ ապրեն։ Այսօր Արցախում ապրող մանուկը ոչ միայն խաղաղ ու երջանիկ չէ, այլև սոված է քնում, անգամ՝ մահանում սովից։ Մի՞թե ճանապարհը բացելու իմ պահանջն ավելի շատ քաղաքական բնույթ կարող է ունենալ, քան՝ մարդկային»,- ասաց նա։
Քաղաքացիները ելույթներից հետո այժմ երթ են անցկացնում Մաշտոցի պողոտայով։
The post Ի աջակցության Արցախի ակցիայի մասնակիցները երթ են անցկացնում Երեւանում appeared first on ԳԱԼԱ.