له جنوبي وزیرستانه د قامي اسمبلۍ غړي او د پښتون ژغورنې غورځنګ مخکښ علي وزیر وکیل قادر خان اېډوکېټ وایي چې د فبرورۍ له اتمې راهیسې په کراچۍ زندان کې د علي وزير پاتې کېدل یو "غيرقانوني" ګام دی. قادر خان د فبرورۍ پر ۱۳مه مشال راډيو ته وويل چې د عدالتونو له امر وروسته د خیبر پښتونخوا حکومت د سیند حکومت ته تېره اوونۍ په یوه لېږل شوي لیک کې د علي وزیر د خوشې کولو ویلي خو د هغه په وينا د سیند صوبایي حکومت څه عمل نه دی ورباندې کړی. بل خوا د سيند د اطلاعاتو وزير شرجيل انعام ميمن ويلی چې د صوبې له بېلا بېلو ادارو څخه تر بشپړ معلوماتو ترلاسه کولو وروسته به خپل دریځ څرګند کړي.
