Мобилизация кысаларында махсус хәрби операциядә катнашучы Апас районы егетләренә тиздән гуманитар ярдәм җибәрелә. Егетләрнең якыннары күчтәнәчләрен 16 февральгә кадәр район хакимияте бинасына китерә ала.
Әлеге уңайдан гуманитар ярдәм җыюны оештыручы махсус төркем кабаттан киңәшмәгә җыелды. Җәмәгать оешмалары җитәкчеләре, аларның вәкилләре, хәрби операциядә булган егетләрнең әниләре катнашында ярдәм чаралары уртага салып сөйләшенде. Бу хакта «Апастово-информ» хәбәр итә.
Егетләргә кирәкле әйберләр исемлеге төзелде һәм расланды. Акчаларны максатчан кулланып, һәрбер кешегә җитәрлек кирәк-яраклар җыелмасы булдыру максаты куелды. Җыелган акчаларның барысы да исәпкә алынып, беркетмә нигезендә теркәлеп баруы хакында да сүз булды.
«Халык китергән әйберләрдән тыш, һәрберсенә шәхси ярдәм илтергә уйлыйбыз. Егетләр белән хәбәрдә торабыз. Исемлекне аларның ихтыяҗын да исәпкә алып, сезнең тәкъдимнәрне тыңлап бергәләп төзибез. Егетләрнең якыннары үзләре әзерләгән күчтәнәчләрне, посылкаларны 16 февральгә кадәр район хакимияте бинасына китерә ала», - диде район башлыгы урынбасары Ленар Хантимиров.
Ул шулай ук район халкының актив булуын, ярдәм чараларына бердәм булып теләктәшлек итүен, олысы-кечесенең хәлдән килгән кадәр булышуын белдерде. Барлык райондашларга рәхмәт сүзләрен җиткерде.
Искәртик, Татарстан Сугыш хәрәкәтләре ветераннарының Координацион советы тәкъдиме белән җәмәгать оешмалары, хәрби хәрәкәт ветераннары, дин әһелләре, өлкәннәр җыелып сөйләшкәннән соң, гуманитар ярдәм җыю башланып киткән иде. Ярдәм җыю әле дә дәвам итә. Ярдәм районнан 17 февральдә китәчәк дип планлаштырыла.
