Фото: Getty Images АҚШнинг Хьюстон университети олимлари биринчи марта наркотикка қарши вакцина ишлаб чиқди. Бу ҳақда Daily Mail хабар берди. Мазкур тадқиқот гиёҳвандликка қарши курашда ютуқ бўлиши мумкин. Ишлаб чиқилган вакцина наркотикнинг каламушлар миясига киришини тўсган ва гиёҳвандликнинг олдини олишда муваффақиятли бўлган. Гиёҳвандликка қарши вакциналарни ишлаб чиқишга уринишлар 30 йилдан ортиқ вақт давомида амалга оширилмоқда. Вакцина билан эмланганда беморнинг қонида наркотикни ушлаб турадиган ва унинг мияга киришига тўсқинлик қиладиган антитаначалар пайдо бўлади. Хьюстон олимлари вакцинада наркотик, иммуноген оқсил ва протеин ёрдамчисидан фойдаланган. Каламушлар эмланганидан олти ҳафта ўтгач, наркотикнинг мияга бориши тўсиб қўйилгани тасдиқланган. Препарат каламушлар миясидаги гиёҳванд модда миқдорини ўн баравар камайтирган. Бундан ташқари, ҳеч қандай салбий таъсир кузатилмаган. Вакцина натижасида пайдо бўлган иммунитет қанчалик барқарор экани ҳали аниқ эмас. Олимлар унинг таъсирини эмлашдан бошлаб 10 ҳафта ичида кузатди. Таъкидланишича, препарат тор мақсадли бўлиб, у ҳайвонларни фақат икки турдаги опиатлардан (наркотик афюн алкалоидлари) — фентанил ва суфентанилдан ҳимоя қилган. Аммо уни яратиш учун ишлатиладиган механизм бошқа наркотикларга қарши вакциналарни ишлаб чиқишда қўлланилиши мумкин. Фентанил — тиббиётда наркотик сифатида ишлатилади, суфентанилдан кучлироқ ва таъсири узоқ давом этади. Эслатиб ўтамиз, COVID-вакцинани яратган BioNTech компанияси саратонга қарши вакцина ишлаб чиқмоқда. У 2030 йилгача тайёр бўлиши мумкин.
