Тинчурин театрының «Кунак бүлмәсе»ндә шагыйрә Гөлүсә Шаһбанның «Сиңа атап яздым» исемле яңа китабын тәкъдим иттеләр. «Сиңа атап яздым» – шагыйрәнең өченче шигырьләр китабы. Ул 1500 тираж белән чыккан. Аларның күбесе мәхәббәт темасына багышланган. Моңа кадәр Гөлүсә Шаһбан «Күңел эретерлек сүзләр бар», «Кабатланмас безнең сөюләр» исемле шигырь китаплары чыгарган иде.
«Минем алтмышлап җырым бар. Аларның һәммәсе дә хит дәрәҗәсендәге җырлар. Шигырьләрем дә халыкка шул җырлар аша танылды. Укучыларым җырларым аркылы иҗатымны якын итте, яратты. Мин моны кайчандыр эшләгән яхшылыкларым өчен Аллаһы Тәгалә үземә дә изгелек итеп кайтара дип кабул итәм», – дип сөйләде Гөлүсә Шаһбан.
Очрашуга студентлар, Гөлүсә Шаһбанның иҗатын яратучы өлкән буын вәкилләре, танылган кешеләр дә килгән иде. Гөлүсә Шаһбанның ире – җырчы Закир Шаһбан хатыны язган «Син минем иң соңгы сөюем», «Кабатла син минем исемне» җырларын җырлады.
«Аның һәрбер шигырен иң беренче булып тыңлаучы да, бәя бирүче дә, тәнкыйтьләүче дә – мин. Ул чыннан да зур казанышларга иреште. Китаплары укучылар тарафыннан бик әйбәт кабул ителә. Социаль челтәрләргә Россиянең бөтен төбәкләреннән, хәтта чит илләрдән дә язалар. Мин аның өчен бары тик шат кына», – диде Закир Шаһбан.