Орбан ја спореди ЕУ со Советскиот Сојуз во говор по повод годишнината од револуцијата
Одбележувајќи ја 66-годишнината од востанието на Унгарија против Советскиот Сојуз, Орбан посочи дека ЕУ, која се обиде да го запре демократското назадување на Унгарија, ќе заврши како Советскиот Сојуз, кој се распадна пред повеќе од три децении.
„Да не се замараме со оние кои пукаат во Унгарија од сенка или од височините на Брисел. Тие ќе завршат таму каде што се нивните претходници“, рече Орбан во говорот пред избраната група гости во руралниот град Залаегершег во западна Унгарија, кршејќи ја традицијата да се одржуваат говори во Будимпешта на годишнината од востанието.
Нов светски поредок и најголемите закани за Западот и демократијата
Говорот на Орбан на важниот национален празник на Унгарија доаѓа во време кога неговата влада се соочува со зголемен притисок од континуираниот бран протести на унгарските наставници и студенти.
Орбан, кој ја карактеризира својата форма на владеење како „нелиберална демократија“, исто така се соочува со закана од кратења на финансирањето на ЕУ поради падот на демократијата и владеењето на правото во Унгарија, како и поради корупцијата.
Во обид да спречи намалување на финансирањето од Брисел, унгарскиот парламент неодамна усвои нов антикорупциски закон.
Сепак, како што пишува АП, Унгарија сè уште ризикува да загуби милијарди евра во финансирање како казна за вооченото прекршување на демократските практики, кои доведоа до слабеење на националната валута и забавување на економијата.
„Тука бевме кога нè нападна првата освојувачка империја, а ќе бидеме и кога последната ќе се сруши“, рече Орбан.
Националниот празник 23 октомври е востановен за да го одбележи почетокот на народното востание во 1956 година против советската репресија што започна во Будимпешта и се прошири низ целата земја.