Жамшид Фозилов. Фото: Facebook Қарши шаҳрининг собиқ ҳокими Жамшид Фозилов 24 соатга қолмай қамоқдан чиқди. Унга нисбатан қўлланилган «қамоқ» эҳтиёт чораси бекор қилинди. Бу ҳақда Telegram’даги «Қитмир мухбир» канали хабар берди. «Қитмир мухбир»нинг ёзишича, Қаршининг собиқ ҳокими Жамшид Фозилов тахминий ҳисоб-китобларга кўра йўқотилган 154 миллиард сўм пулнинг 60 миллиарддан кўпини бир ўзи «еган». Шунга қарамай унга нисбатан қўлланилган қамоқ эҳтиёт чораси бекор қилинган. «Дарё» манбасининг аниқлаштиришича, Жамшид Фозилов бугун, 21 октябрь куни Жиноят ишлари бўйича Қашқадарё вилояти суди судьялари қарорига кўра, озодликка чиққан. Вилоят прокуратураси эса унга нисбатан 60 миллиард сўмдан ортиқ маблағни ўзлаштириш бўйича айблов қўйган. Аввалроқ Термизнинг собиқ ҳокими ва унинг шериклари давлат ва жамият ҳамда тадбиркорлар манфаатига 35,6 миллиард сўм зарар етказгани, шу сабаб собиқ ҳоким ва масъуллар қамоққа олингани ҳақида хабар берилганди.
