Диния нәзарәте Татарстаннан мобилизацияләнгән мөселман солдатлары һәм аларның якыннары белән элемтәдә тору, мөһим мәгълүмат җиткерү, сорауларга җавап бирү һәм рухи ярдәм күрсәтү өчен WhatsApp мессенджерында махсус төркемнәр булдырды.
Диния нәзарәте матбугат хезмәте хәбәр итүенчә, мессенджердагы ике аерым аралашу чатында мөфтиятнең мөселманнар белән эшләргә билгеләнгән имамнар һәм шәригать бүлеге белгечләре керә.
Чатлар ярдәмендә мөфтият вәкилләре «Казан Экспо» Халыкара күргәзмәләр үзәгендә, танк училищесында һәм танк полигонында урнашкан чакырылган солдатларны җыю урыннарында хәләл туклануны һәм җәмәгать намазларын оештыра. Шулай ук дини консультацияләр бирә, ә аларның якыннарына киңәшләрен җиткерә, психологик ярдәм күрсәтә. Моннан тыш, солдатларны җыю пунктларында эшләү өчен нәзарәт тарафыннан махсус имамнар беркетелде һәм шәригать белгечләре белән очрашулар уздырыла.
Нәзарәт мобилизацияләнгән мөселман солдатлары һәм аларның якыннарын әлеге чатларга кушылырга чакыра. Моның өчен Динар хәзрәт Касыймовка +7 937 282 0280 номеры буенча мөрәҗәгать итәргә мөмкин.
