ხარკოვის სხვადასხვა რაიონში და ოლქში არ არის ელექტრომომარაგება რუსეთის არმიის მიერ ინფრასტრუქტურის ობიექტებზე დარტყმების გამო. ელექტრომომარაგების პრობლემებზე იტყობინებიან ასევე პოლტავისა და სუმის ოლქებშიც.
ხარკოვიდან იუწყებიან, რომ ქალაქის სხვადასხვა რაიონებში შუქი არ არის. ასევე არ არის ელექტროენერგია ლოზოვაშიც, როგორც "Суспільне Харків"-ი იტყობინება. მოგვიანებით, ხარკოვის მერმა, იგორ ტერეხოვმა განაცხადა, რომ რუსებმა დარტყმა მიაყენეს ხარკოვის ინფრასტრუქტურულ ობიექტებს. "იერიშის შედეგად ქალაქის ბევრ რაიონში შუქი გაითიშა. ამავე მიზეზით, იმავე რაიონებში არ არის არც წყალი - არ მუშაობს ტუმბოები..." დაწერა ტერეხოვმა. ხარკოვის სამხედრო საოლქო ადმინისტრაციის უფროსის, ოლეგ სინეგუბოვის თქმით, დარტყმა მიაყენეს ხარკოვისა და ოლქის კრიტიკულ ინფრასტრუქტურას. "ზოგიერთ დასახლებულ პუნქტში არ არის ელექტრო და წყალმომარაგება. დარტყმების ადგილებში გაჩნდა ხანძრები, უკრაინის საგანგებო ვითარების სახელმწიფო სამსახურის საოლქო სამმართველოს მაშველები ხანძრის ლოკალიზებას ახდენენ. ყველა სპეციალიზებული სამსახური ადგილზე მუშაობს.“
დერგაჩევის საქალაქო საბჭო იტყობინება, რომ თემის ტერიტორია მთლიანად ელექტროენერგიის გარეშეა, იმიტომ რომ კრიტიკული ინფრასტრუქტურის ობიექტებს დაარტყეს. ელექტრომომარაგება არ არის ასევე კრამატორსკშიც, დონეცკის ოლქში.
პოლტავის სამხედრო საოლქო ადმინისტრაციის უფროსი იტყობინება, რომ "შუქი და წყალმომარაგება ოლქში მალე აღდგება. ენერგეტიკოსები უკვე მუშაობენ. ამას გარდა, სუმის სამხედრო საოლქო ადმინისტრაციის უფროსი, დმიტრი ჟივიცკი იტყობინება, რომ მთელი ოლქის ელექტროქსელში ძაბვა დაეცა. ელექტროენერგიის პრობლემების შესახებ იუწყებიან რუსეთის ქალაქ ბელგოროდშიც. ქალაქის მერის თქმით, ბელგოროდი ნაწილობრივ ელექტროენერგიის გარეშეა ქვესადგური "იუჟნაიას" მწყობრიდან გამოსვლის გამო, სადაც ხუთშაბათს დიდი ავარია მოხდა.
ენერგეტიკოსები ამბობენ, რომ [ელექტროენერგიის მიწოდებას] ერთი საათის განმავლობაში აღადგენენ, წერს "რია ნოვოსტი".
კვირა საღამოს მთელ უკრაინაში, ოკუპირებული ყირიმის გარდა, საჰაერო განგაში გამოცხადდა.