Белсенді Кенжебек Әбішев қайтыс болды
– Таңғы бес жарымда жүріп кетті. "Асқазаным шеге жұтып қойғандай боп, ауырып тұр" деп шағымданды. Жедел жәрдем шақырып едім, олар келгенше жүріп кетті. "Жүрегі, инфаркт" деді. Қуанышым ұзаққа бармады ғой, көнем ғой, не істеймін басқа?, – деді жасын тыя алмаған белсендінің әйелі.
Кенжебек Әбішев былтыр 13 қазанда шартты түрде мерзімінен бұрын босап шыққан еді. Ол "жазасының" қалған бөлігі яғни, 2 жыл 4 ай 20 күнді бостандығы шектелген күйі өтеуі тиіс-тін.
Алматы облыстық соты 2018 жылғы 21 желтоқсанда Кенжебек Әбішевті "терроризмді насихаттады" деген айыппен жеті жылға соттаған еді. Билік оны "Қазақстанның демократиялық таңдауы" қозғалысына қатысы бар деп айыптады. Нұр-Сұлтан соты бұл қозғалысты экстремистік ұйым деп таныған. Бірақ Еуропарламент оны бейбіт ұйым деп атаған. Қозғалысқа қуғындағы экс-банкир, қазір шетелде тұратын Мұхтар Әблязов жетекшілік етеді.
2019 жылы апелляциялық сот үкімді өзгеріссіз қалдырған. Бірақ 2020 жылғы 13 наурызда Қапшағай қалалық соты жаза мерзімін азайтқан.
Қазақстандық құқық қорғаушылар Кенжебек Әбішевті саяси тұтқын деп таныған. Былтыр 11 ақпанда Еуропарламент Қазақстандағы адам құқығы ахуалы туралы қабылдаған қарарында Нұр-Сұлтанды елде түрмеде отырған саяси тұтқындарды босатуға үндеген. Қарарда 28 саяси тұтқынның бірі Кенжебек Әбішевтің де аты аталды.
Қазақстан билігі елде саяси тұтқын жоқ деп есептейді.