Нұрсұлтан Назарбаевтың немере інісі Самат Әбіш қызметінен кетті
43 жастағы Самат Әбіш – Қазақстанның бұрынғы президенті Нұрсұлтан Назарбаевтың інісі Сатыбалды Назарбаевтың ұлы. Ол бұл қызметті 2015 жылдан бері атқарып келеді. Ұлттық қауіпсіздік комитетінде 2010 жылдан бастап жұмыс істейтін Самат Әбіш күш құрылымдарындағы ықпалды адамдардың бірі саналатын.
Қаңтар оқиғалары ушығып тұрған 5 қаңтар күні Тоқаевтың өкімімен президент әкімшілігі жетекшісінің орынбасары Мұрат Нұртілеу Ұлттық қауіпсіздік комитеті төрағасының орынбасары болып тағайындалғанда, Самат Әбіштің тағдыры түсініксіз болып қалды. Билік оның қызметінен кеткенін, не өз орнында қалғанын айтпады. Бірақ санаулы күннен соң комитет Самат Әбіштің қызметінен кетпегенін, әлі де төрағаның бірінші орынбасары екенін айтқан. Сөйтіп комитет төрағасының екі бірінші орынбасары жұмыс істеді.
14 қаңтарда Ұлттық қауіпсіздік комитеті Самат Әбіштің демалыста екенін хабарлаған.
Ұлттық қауіпсіздік комитетінің бастығы болған Кәрім Мәсімов 6 қаңтар күні жұмыстан босатылып, екі күннен кейін ұсталды. Ол "мемлекетке сатқындық жасау", "қызметін асыра пайдалану", "билікті күшпен басып алу" істері бойынша күдікке ілініп отыр.