(Әлки, 17 декабрь, «Татар-информ», «Әлки хәбәрләре» , Лия Мәрдегалләмова). Әлки районы эчке эшләр бүлекчәсе коллективы хезмәттәшләре Илнар Сибаевны Дагыстан Республикасына алты айлык хезмәткә озатты. «Дагыстанда һәм Чечня Республикасында хезмәт иткән әлкилеләрнең барысы да бурычларын намус белән үтәделәр. Сезнең өчен 180 тәүлек сизелмичә дә үтеп китәр дип ышанам һәм туган ягыбызга исән-имин әйләнеп кайтуыгызны телим», — диде өлкән лейтенантка район полиция бүлекчәсе начальнигы Ришат Насыйбуллин. Илнар Сибаев хокук саклау органнарында 15 елдан артык хезмәт куя. Шушы вакыт эчендә ул үзен максатчан, җаваплы хезмәткәр итеп күрсәтте. Бүлекчәдә ул вакытлыча ябып тоту изоляторы начальнигы вазифаларын үти. Ә Дагыстанда корал буенча матди җаваплы зат итеп билгеләнәчәк. Әмма моңарчы Казанда бер атна укулар үтәчәк ул. Өендә Илнар Сибаевны иң якын кешеләре — хатыны Рәсинә һәм икенче сыйныфта укучы кызы Эмилия түземсезлек белән көтәчәк.
