(Казан, 17 декабрь, «Татар-информ»). Ульяновскиның татар мәдәният үзәгендә «Социализм чыршысы»н ачу тантанасы узды. Фойеда тирә-юньгә ямь өстәп, хуш исле ылыс исе таратып утыручы яшел чыршыны узган гасырның 50-80 елларында эшләнгән чыршы уенчыклары, Кыш бабай белән Кар кызы курчаклары һәм шул чорда басылып чыккан котлау открыткалары белән бизәгәннәр. Бу хакта «Өмет» газетасы хәбәр итә. Мәдәният үзәге җитәкчесе Рамилә Сафина белдергәнчә, гирляндаларны да балалар үз куллары белән ясаганнар. Мәдәни үзәккә төрле түгәрәкләргә йөрүче балалар чыршы тирәли әйләнә-әйләнә якташлары Сәхаб Урайский иҗат иткән «Яшел чыршы» җырын башкарды.