Россиянинг iFly Airlines ширкатига 25 ноябрдан бошлаб Ўзбекистонга парвозларни амалга оширишга рухсат берилди. Бу ҳақда “Интерфакс” “Ўзавиация” расмий вакилига таянган ҳолда хабар берди.
“Ўзавиация” бундан икки ҳафта аввал iFly Airlines ширкатига Ўзбекистондан парвозларни амалга оширишни тақиқлаган эди. Бунга ширкат Uzbekistan Airports билан келишмай туриб, чартер рейслар амалга оширилишини эълон қилиб, аҳолига чипталар сотгани сабаб бўлган эди.
8 ноябрь куни Россиянинг Москва ва Санкт-Петербург шаҳарларига учиш ниятида iFly Airlines рейсига чипта сотиб олиб “Навоий” халқаро аэропортига келган 200 киши сарсон бўлганди. Уларга чипта пуллари қайтариб берилганидан сўнг, йўловчилар аэропортни тарк этган.
Мазкур ширкат рейсларига чипта сотиб олган уч юзга яқин йўловчи 4 ноябрь куни Урганч аэропортида ҳам сарсон бўлган эди.
“Ўзавиация” расмийсининг айтишича, iFly Airlines бундан буён бундай ҳолатлар такрорланмаслигини кафолатлагани ортидан ширкатга Навоий, Урганч ва Наманганга парвозларни амалга оширишга рухсат берилди.