اروپایي ټولنې مولداويا سره د ۶۰ میلیونه یورو مرستې اعلان وکړ
د اروپایي کمېسیون مشر اورزلا وان دیرلین پرون دا ژمنه وروسته تردې وکړه چې د اوونۍ په پيل کې مولداويا له پولنډ څخه یو میلیون متر مکعب ګاز واخېست.
د روسیې ګاز پروم شرکت پخوا یو متر مکعب ګاز پنځه سوه پنځوس ډالرو خرڅاوه او اوس یې بیه اووه سوه نوي ډالرو ته لوړه کړې ده.
مولداويا چې دوه میلیونه او شپږ لکه نفوس لري هرکال دوه اعشاریه اته میلیارډه مترمکعب ګازو ته اړتیا لري.
لویدیځ هېوادونه روسیه تورنوي چې له انرژي د یوې سیاسي وسیلې په توګه استفاده کوي، خو کرملین دا تورونه ردوي.