Самарқанд туманида газ йўқлигидан норози бўлиб катта йўлни тўсиб қўйган 13 киши суд томонидан маъмурий жавобгарликка тортилди. Бу ҳақда Самарқанд вилоят Ички ишлар бош бошқармаси хабар берди.
Бошқарманинг билдиришича, Самарқанд тумани Янгиариқ-1 маҳалла фуқаролар йиғинига қарашли Чунгул кўчасида яшовчи 13 киши 26 сентябрь куни соат 12:10 да табиий газ йўқлигидан норозилик билдириб, М-37 автомобиль йўлининг 8—9-километридаги қисмини тўсиб қўйган.
Хабарда маҳалла 2015 йилда табиий газ тармоғидан узилб қўйилгани ва суюлтирилган газ баллонлари билан таъминланиб келингани айтилади. Маълум бўлишича, сўнгги марта маҳаллага 2021 йилнинг 29 июль куни суюлтирилган газ баллонлари тарқатилган.
Йўлни тўсиб қўйиш ҳолати юзасидан жиноят иши очилиб, судга жўнатилган. 27 сентябрь куни Жиноят ишлари бўйича Самарқанд тумани суди йўл тўсганларни Маъмурий жавобгарлик тўғрисидаги кодекснинг 183-моддаси (майда безорилик) ҳамда 201-моддаси (йиғилишлар, митинглар, кўча юришлари ёки намойишлар уюштириш, ўтказиш тартибини бузиш) асосида айбдор деб топган.
Норозилардан икки нафарига йўл тўсиш ташкилотчиси сифатида 5 суткадан маъмурий қамоқ жазоси тайинланди, қолган 11 киши жаримага тортилди.