(Бөгелмә, 28 август, «Татар-информ», « Бөгелмә авазы »). Спас авылының бәйрәмчә бизәлгән территориясендә бал һәм декоратив-гамәли иҗат әйберләреннән күргәзмә-сату, рус халкының милли ризыклары һәм көнкүреше күргәзмәләре тәкъдим ителде. Шулай ук Спас авылы Вознесение храмы настоятеле иерей Александр Бердников бал һәм бал продукциясен изгеләндерү тантанасын үткәрде. Яңа Александровка, Ефаново, Иске Исаково, Спас һәм Иске Сумарок авыл мәдәният йортлары үзешчән сәнгатьтә катнашучылар бәйрәм программасын әзерләделәр. Концерт номерларыннан тыш, тематик табышмаклар, уеннар һәм әйлән-бәйлән тәкъдим ителде. Программа ахырында барлык катнашучыларны бәйрәм табынына чакырдылар, анда теләге булган һәркем бал камырларын, үлән чәен һәм балның төрле сортларын татып карады.
