Првиот вицепремиер во Владата, Артан Груби денеска изјави дека тендерот за организација на настаните поврзани со одбележувањето на 20-годишнината од Охридскиот рамовен договор бил транспарентен. Според него, трошокот „нема да биде поголем од придобивката што ја имаме од Охридскиот рамковен договор“.
„Во однос на тендереската постапка, се беше транспаретно, меѓународен тендер и се заврши со позитивно мислење на Бирото за јавни набавки. Цената е таа, но не мора да значи дека тоа ќе го исплатиме на крај затоа што се работи за настани што ги организираме веќе еден месец, а ќе продолжат и по 13 август. Не се работи само за 13 август, туку за повеќе и ќе видиме на крај кои се трошоците, но секако овој трошок нема да биде поголем од придобивката што ја имаме од Охридскиот рамковен договор, а тоа траен мир, инклузивно општество, земја во НАТО и со европска перспектива. Во тоа голем удел има и Охридскиот рамковен договор“, рече Груби во интервју на Канал 5 ТВ.
За прославата на годишнината од потпишувањето на Охридскиот рамковен договор беше распишан меѓународен тендер во вредност од 30 милиони денари. Груби денеска во Државниот архив достави оригинален примерок од Охридскиот рамковен договор.
„Седум потписници има Охридскиот рамковен договор, пет лидери од нашата земја, и двајца странци Пердју и Леотар и ниту еден од нив немаше зачувано оригинална копија на Охридскиот рамковен договор. За среќа нашето неколкумесечно истражување беше успешно и идентификувајќи ги луѓето кои учествуваа, не само протагонисти од потпишување на договорот, туку и помошниците од страна успеавме да најдеме една од тие седум официјални веризии на Охридскиот рамковен договор што денеска ја поднесовме во државниот Архив“, рече Груби.
