(Казан, 12 апрель, «Татар-информ»). Самара өлкәсенең ике торак пунктында башкорт теле дәресләрен кертергә мөмкиннәр.
Самара татарлары сайтында хәбәр ителгәнчә, Украинка һәм Көньяк бистәләрдә әти-әниләр гариза җыйганнар инде. Мәктәпләрдә башкорт теле укытучылары да бар. Бу хакта Самара өлкәсе башкортлар корылтае җитәкчесе Сафиулла Вилданов хәбәр иткән.
Төбәктә башкорт телен, ата-бабаларның мәдәни мирасын саклау һәм үстерү проблемаларына багышланган түгәрәк өстәл узган. Түгәрәк өстәлдә катнашучылар шулай ук Ыргызлы авылы мәктәбендә башкорт теле сәгатьләрен арттыру кирәклеге турында хәбәр иткән.
Самара өлкәсе башкортлары корылтаеның түгәрәк өстәле эшендә губернатор хакимияте, өлкә мәгариф министрлыгы, шулай ук ата-аналар берләшмәсе, экспертлар катнашкан.
