“Фариданинг икки минг қўшиғи” “Ника”га даъвогарлик қилмоқда
“Ўзбеккино” МА буюртмасига биноан режиссёр Ёлқин Тўйчиев томонидан суратга олинган “Фариданинг икки минг қўшиғи” бадиий фильми “Ника” киномукофотининг “Болтиқбўйи ва МДҲ мамлакатларининг энг яхши фильми” номинацияси учун даъвогарлар рўйхатига киритилди.
Мазкур нуфузли кинофестивалда Қозоғистондан иккита фильм, режиссёр Ернар Нургалиевнинг “Жоним, сен ишонмайсанми?” («Жаным, ты не поверишь»), Адилжан Ержановнинг “Сариқ мушукча” («Желтая кошка»), Озарбайжондан Хилал Байдаров Узейининг “Ўлимдан ўлимгача” («От смерти до смерти»), Қирғизистондан режиссёр Артик Суюндиковнинг “Шамбала” фильмлари ўрин олган.
Пандемия туфайли 2019 йилги “Ника”нинг тантанали тақдирлаш маросими 2021 йилнинг баҳорига кўчирилганди.
Киномукофотнинг 2019 ва 2020 йилги тантанали тақдирлаш маросими бир вақтда 2021 йилнинг апрелида ўтказилиши режалаштирилган.
“Ўзбеккино” Миллий агентлиги Ахборот хизмати