Забрането е емитување на британскиот телевизиски канал Би Би Си ( BBC World News) во Кина, информира Националната управа за радио и телевизија во соопштението објавено денеска.
До соопштението дојде по една недела откако британскиот регулатор за медиуми ја одзеде дозволата за емитување на кинеската државна телевизија.
Содржината на британскиот канал „сериозно“ ги кршеше упатствата за известување во земјата, вклучувајќи го и „барањето вестите да бидат вистинити и фер“ и да не им „штетат на националните интереси на Кина“, се вели во соопштението во кое се дополнува дека „државната управа за филм, ТВ и радио не дозволува Би-Би-Си да продолжи со емитување во Кина и не ја прифаќа нејзината нова годишна апликација за емитување“.
Портпаролката на Би-Би-Си изјави дека се разочарани што кинеските власти одлучија да преземат ваков чекор.
„Би-Би-Си е најдоверлив меѓународен радиодифузер во светот и известува за стории од целиот свет праведно, непристрасно и без страв и привилегија", се вели во реакцијата на Би Би Си.
