Advokat Nikolay Polozov, Rostov-na-Donu Cenübiy bölyeniñ arbiy mahkemesiniñ qırımlı Enver Ömerovğa Qarasuvbazar “Hizb ut-Tahrir davası” boyunca çıqarılğan ükmüne qarşı Rusiye İstinaf arbiy mahkemesine şikâyet bergenini bildirdi. Bu aqta Qırım.Aqiqatqa “Qırım birdemligi” cemaat birleşmesi haber etti.
Polozov, yaqında davanen oğraşıp başlağanını ayttı ve şimdilik dava müddetleri qısqa olğanı sebebinden qısqa istinaf şikâyetini bergen. Amma keleckte bu şikâyetke daa malümat qoşulacaq eken.
“Cinayet davasınıñ materiallarınen, mahkeme oturışınıñ protokollarınen tanışacaq olam. Elbette, Enver Ömerovnen körüşecegim ve bu işniñ neticelerine köre qoşma malümat, tafsilâtlı deliller olacaq ve olar bugünki şikâyetke qoşulacaq”, – ayttıp berdi advokat birleşmege.
Yanvarnıñ 12-nde, salı künü, Rostov-na-Donudaki Cenübiy bölgeniñ arbiy mahkemesi Qarasuvbazar “Hizb ut-Tahrir davası”nıñ mabüslerine üküm çıqardı: Enver Ömerovğa 18 yıl Ayder Cepparovğa 17 yıl, Riza Ömerovğa 13 yıl.
Ukraina Yuqarı Radasınıñ insan aqları vekâletlisi Lüdmila Denisova, yanvarnıñ 12-nde Cenübiy bölgeniñ arbiy mahkemesi Qarasuvbazar “Hizb ut-Tahrir davası”nıñ mabüslerine çıqarğan ükümni takbih etti ve halqara toplulıqnı küç-quvetini birleştirmege davet etti.
Ukraina TİN Rusiyeden Cenübiy bölgeniñ arbiy mahkemesiniñ Qarasuvbazar “Hizb ut-Tahrir davası” boyunca bugünki qararınıñ lâğu etilmesini ve “mahküm etilgen Enver ve Riza Ömerovlar ve Ayder Cepparovnıñ ve diger ukrain siyasiy mabüsleriniñ deral azat etilmesini” talap ete.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
