Сауд Арапстан Катар менен чек арасын кайрадан ачты
Эки өлкөгө арачылык кылган Кувейттин Тышкы иштер министри бул тууралуу расмий маалымдады. 5-январда Катардын эмири Сауд Арапстандын ал-Ула шаарында өткөрүлүп жаткан Булуңдагы арап өлкөлөрүнүн жана Египеттин саммитине катыша тургандыгы да кабардалды.
Катар эмири Тамим бин Хамад Аал-Тани (Tamim bin Hamad Al Thani) бул саммитке катыша тургандыгын тастыктаганын "ал-Жазира" медиа компаниясы 4-январда билдирди.
Булуң Кызматташтыгы Кеңешинин саммити маалында Сауд Арапстан, Бириккен Арап Эмирликтери, Бахрейн жана Египет кайрадан Катар менен мамилелерди жакшыртуу тууралуу келишимге кол коюшаары күтүлөт. Бул расмий жөрөлгөгө саудиялык падыша Салман ибн Абдул-Азиз ас-Сауд өзү, ошондой эле АКШнын президенти Доналд Трамптын кеңешчиси жана күйөө баласы Жаред Кушнер баш болгон америкалык мартабалуу өкүлдөр да катышмакчы.
Төрт арап өлкөсү (Сауд Арапстан, Египет, Бириккен Арап Эмирликтери жана Бахрейн) 2017-жылы Катарды террорчулукту колдоп жатат жана иранчыл турумда болууда деп айыпташкан жана аны менен дипломатиялык алакаларын үзүп салган. Алар Катарга 13 талап коюшкан. (Арасында "ал-Жазира" каналын жабуу талабы да бар болчу). Катар бул талаптарды четке каккан жана аларга каршы сотко кайрылган соң, анын каршылаштары бул өлкө менен дипломатиялык мамилелерин убактылуу тоңдуруп салышкан болчу.
Кувейт менен АКШ болсо өз ара тирешкен тараптарды элдештирүүгө далаалат кылып келген. Эми Катар да шейшембиде кайра элдешип жаткан шериктери менен соттошуудан баш тартты. (TT)