Најмалку седум мировници на Синај загинаа во пад на хеликоптер

Најмалку седум припадници на меѓународните мировни сили на египетскиот полуостров Синај денеска загинаа во пад на хеликоптер, потврдија претставници на Египет и на Израел. Двете страни соопштија дека леталото паднало поради техничка неисправност и оти нема знаци дека било нападнато, пренесува Асошиејтед прес.


Загинатите, меѓу кои петмина Американци и по еден Французин и Чех, биле членови на меѓународните сили кои го надгледуваат спроведувањето на мировниот договор меѓу Израел и Египет. Еден преживеан е пренесен во болница во Израел.


Израел, заедно со Египет и САД, е еден од основачите на таа независна мисија, која не е поврзана со ОН.


Со израелско-египетскиот мировен договор од 1979 предвидена е демилитаризација на Синај, каде што Мултинационалните сили и набљудувачи се наоѓаат од почетокот на 80-тите години од минатиот век.


Над 1100 војници од 13 различни земји, а најмногу од САД, се распоредени на Синај, каде што делуваат разни вооружени групи, меѓу кои и локален огранок на Исламската држава.