Baş nazir muavini, Ukrainanıñ vaqtınca işğal etilgen topraqlarınıñ reintegratsiya meseleleri naziri Oleksiy Reznikov işğal altındaki Qırımnıñ Ukrainağa qaytarıluvı işğal etilgen Donbas qısmınıñ qaytarıluvından «daa qolay» ola bile, dep ayttı. Bu fikrini o, Azatlıq Radiosınıñ «Subotne intervyü» yayınında bildirdi.
«Şunı aytayım, Qırım meselesi ve Qırımnıñ Ukrainağa qaytarıluvı bugün, belki, daa qolay olur, çünki anda işğal etilgen Donbas topraqlarında kibi cenk uruşları olmadı. Daa az qan aqtı», – dedi Reznikov.
O, Qırımda ealini deñiştirüv «al etilmesi kerek olğan vazife» olğanına razı oldı.
«Er şey qolay olmay. Bugün klassik cenkler olmağan gibrid cenkler olğan dünyada yaşaymız. Şunıñ içün gibrid istilâğa cevap ve ondan qoruv gibrid areketleri olmalı», – dedi Reznikov.
Daa evel berilgen malümatqa köre, Ukraina Baş prokurorı ofisiniñ matbuat hızmeti bildirgenine köre, Rusiyeniñ Qırım işğali devamında yarımadanı aman-aman 48 biñ insan terk etti. Rusiyeliler yarımadanı faal sürette müstemlekeleştire.
Ukrainanıñ vaqtınca işğal etilgen topraqlarınıñ reintegratsiya meseleleri nazirligi işğal başlamazdan evel Aqyar ealisi 400 biñ kişi edi, dep qayd etti. Müessise, yañı kelgenlerniñ ekseriyeti Rusiye arbiyleri ola, dep bildire ve şeer ealisini aselet deñiştireler, dep ayta. Mart ayında Krımstat bildirgenine köre, resmiy malümatqa köre, 2014 senesinden soñ Rusiyeden Qırımğa 172 biñden çoq insan çalışmağa keldi: 96 biñi Qırımda, 76 biñi Aqyarda qayd oldı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
