МВФ: Мы знаходзімся „ў фазе дыскусій” з уладамі Беларусі па пытанні фінансавання
Міжнародны валютны фонд знаходзіцца з уладамі Беларусі „ў фазе дыскусій” у сувязі з беларускім запытам на атрыманне хуткага фінансавання, паведаміў старшы пастаянны прадстаўнік МВФ па рэгіёне Цэнтральнай і Усходняй Еўропы Надзім Ілахі.
„Мы знаходзімся ў фазе дыскусій з беларускімі ўладамі. Я не магу зараз сказаць больш”, — адзначыў Ілахі, адказваючы на пытанні БелаПАН 21 мая падчас вебінара, арганізаванага Даследчым цэнтрам ІПМ і Фондам Конрада Адэнаўэра.
У сваю чаргу дырэктар дэпартамента камунікацый МВФ Джэры Райс падчас відэабрыфінгу 21 траўня заявіў, што Міжнародны валютны фонд ацэньвае сітуацыю і эканамічную палітыку ў Беларусі ў сувязі з беларускім запытам на атрыманне хуткага фінансавання.
„Я магу пацвердзіць, што мы атрымалі беларускі запыт для атрымання сродкаў у рамках інструмента хуткага фінансавання. МВФ вядзе перамовы з беларускімі ўладамі, ацэньвае сітуацыю і палітыку ўладаў Беларусі”, — сказаў Райс, адказваючы на пытанне БелаПАН.
У сакавіку гэтага года беларускія ўлады звярнуліся да МВФ па фінансавую падтрымку з-за каронавіруса. У сумесным прэс-рэлізе ўрада і Нацбанка паведамлялася, што фінансавую падтрымку ўлады просяць у МВФ „у сувязі з выклікамі, якія стаяць перад эканомікай краіны з-за пагаршэння глабальнай эканамічнай сітуацыі і пандэміі каронавіруса”.
Гаворка ідзе пра інструмент хуткага фінансавання МВФ, „які прызначаны для аказання краінам — членам фонду фінансавай дапамогі для падтрымкі мер палітыкі ўладаў па пераадоленні сітуацый, якія патрабуюць экстраннага фінансавання”.
МВФ раней заявіў аб гатоўнасці выдзеліць на гэтыя мэты краінам з сярэднім узроўнем даходу да 40 млрд даляраў ЗША, улічваючы рэзкае пагаршэнне глабальнай эканамічнай сітуацыі ў сувязі з пандэміяй каранавіруса. Беларускія ўлады запыталі ў МВФ у сувязі з гэтым падтрымку ў памеры 900 млн даляраў.
Тэма прыцягнення хуткага фінансавання ад МВФ абмяркоўвалася 14 мая ў час сустрэчы Аляксандра Лукашэнкі з кіраўніком урада Сяргеем Румасам, аднак падрабязнасцяў абмеркавання гэтага пытання прэс-служба кіраўніка дзяржавы не распаўсюдзіла.
Як паведамлялася, Беларусь у 2015—2016 гадах вяла перамовы з МВФ аб атрыманні крэдыту для структурных пераўтварэнняў у эканоміцы, аднак так і не дамовілася з фондам пра падпісанне крэдытнай праграмы. У 2017 годзе перамовы аб крэдытнай праграме паміж Беларуссю і МВФ былі пастаўленыя на паўзу.
У сакавіку 2020 года чакалася планавая місія персаналу МВФ у Беларусь для кансультацый па макраэканамічных пытаннях, аднак яна не адбылася з-за пандэміі каронавіруса.
У красавіку 2020 года міністр фінансаў Максім Ермаловіч паведаміў, што рэсурсы МВФ Беларусі патрэбныя для падтрымання макрафінансавай стабільнасці.
„Гэтыя сродкі з’яўляюцца крыніцай для забеспячэння агульнай макрафінансавай збалансаванасці. У іх няма мэтавага прызначэння, у іх некалькі мэтаў, у тым ліку і забеспячэнне ўстойлівасці дзяржаўнага доўгу, фінансаванне дзяржаўных выдаткаў і гэтак далей”, — растлумачыў Ермаловіч.
belapan.by