Moskvada Rusiyede apiste tutulğan qırımtatarlar içün bir kişilik narazılıq aktsiyalarını keçirmege azırlanalar

Faaller, Moskvada yanvarniñ 22-nde Rusiye Baş prokuraturasınıñ binası ögünde bir sıra bir kişilik narazılıq aktsiyasını keçirmege niyetlene. Böylece, baş prokurorğa muracaat etip, Cezalarnı yerine ketirüv federal hızmeti sistemasında tibbiy yardımnı kösterüv vaziyetine acele kirişmesini talap etecekler. 


Aktsiya vaqtında faaller ekimlerniñ yardımına muhtac mabüslerniñ soyadlarınen resmiy mektüp yazacaq ola, dep bildirdi aktsiyanıñ teşebbüsçileri Qırım.Aqiqatqa. Tibbiy yardımğa ihtiyacı olğanlar arasında qırımlılar Cemil Gafarov, Enver Ömerov, Server Gaziyev, Asan Yanikov ve digerleri bar. 


«Bir çoq mabüs yaramay şaraitlerde tutula, rıqma-rıq tolu, nemli, yahşı qızdırılmağan ve aydınlatılmağan kameralarda yata, yataqlar yetmegeni içün gece nevbetnen yuqlamağa mecburlar. Aş iç bir tenqitke dayanamaz. Kameralar sıq-sıq antisanitariya vaziyetinde ola, qandalay, furun böcegi ve diger böcekler bar, olarnı yoq etmeyler, hastalıqlar ise arta. Yardımğa muhtac olğan insanlarnıñ cedveli uzun ve kün-künden arta», – dep yazdı aktsiya teşebbüsçisi Olga Mazurova Facebookta. 




Teşebbüs gruppası qırımtatarlarğa qoltutmaq içün yanvarniñ 18-nde Moskvada Arbatqa narazılıq aktsiyasına endi çıqqan edi. 


Advokat Ayder Azamatov, müvekkili – Yaltadaki «Hizb ut-Tahrir davasınıñ» mabüsi Arsen Cepparovğa kerekli tibbiy yardım kösterilmey dep, Rostov vilâyetiniñ Şahtı şeerindeki SİZO-4 hadimleriniñ areketsizligini şikâyet etmek içün yanvarniñ 20-nde Rusiye Baş prokuraturası, Rostov vilâyetiniñ prokuraturası ve Rostov vilâyetindeki Rusiye Cezalarnı yerine ketirüv federal hızmeti Baş idaresine bir sıra ariza yolladı. 


SİZOda Cepparovnıñ sağlığı içün olğan telükeler aqqında advokatı daa evel de bildirgen edi, Ukraina ombudsmeni Lüdmila Denisova ise Rusiye zenaatdaşı Tatyana Moskalkovağa muracaat etip, acele tedbip almasını talap etti. Lâkin Moskalkova daa cevap bermedi.