Apple Netflix, Disney ва HBO компанияларини ортда қолдириб, ўзининг стриминг сервиси учун оригинал сериал ва фильмлар яратиш учун ўз бюджетини бир неча бор оширди, деб хабар бермоқда Forbes. Натижада Apple TV+ учун суратга олинган Женнифер Энистон ва Риз Уизерспун иштирокидаги «Эрталабки шоу» сериали эпизоди «Тахтлар ўйини»нинг финал мавсумидан ҳам қимматга тушган. Хабарда айтилишича, Apple ўзининг стриминг сервисини яратишга бир неча йил олдин тайёргарлик кўрган ва 2017 йилдаёқ шу мақсадда Sony Pictures Television топ-менеджерлари бўлган Жейми Эрликт ва Зак ван Амбергни ишга олган. Аввалига компания ўз контенти учун биринчи йилда 1 миллиард доллар сарфлаши кўзда тутилган, лекин кейинчалик бюджет сезиларли даражада оширилган.
