პრესსამსახური ავრცელებს, გუგუტიანთკარში მამუკა ბახტაძის ჩასვლის შესახებ ცნობას
„მნიშნელოვანია, უშუალოდ მოსახლეობისაგან მოვისმინო იმის შესახებ, რაც მათ აწუხებთ და სჭირდებათ“, - ვკითხულობთ პრესრელიზში ციტირებულ ბახტაძის სიტყვებს.
პრესსამსახურის ცნობით, გუგუტიანთკარში მცხოვრებმა გოჩა მარღიშვილმა პრემიერ-მინისტრს ტელევიზიის საშუალებით რამდენიმე დღის წინ მიმართა და შეხვედრა სთხოვა.
მამუკა ბახტაძე ამბობს, რომ კიდევ უფრო დაჩქარდება ინფრასტრუქტურული პროექტებზე მუშაობა.
„ჩვენ ბოლო წლების განმავლობაში ბევრი პროექტი განვახორციელეთ აქ, მაგრამ გვაქვს მიმდინარე პროექტებიც, რომელთა ტემპები კიდევ უფრო დაჩქარდება. მოსახლეობის თხოვნით მალე გადაიჭრება სასმელი წყლის მიწოდების პრობლემა, დავასრულეთ გზის მშენებლობა, მოვაწყეთ სარწყავი ინფრასტრუქტურა. ელექტროენერგიითა და ბუნებრივი გაზით ადგილობრივი მოსახლეობა უზრუნველყოფილია”, - განაცხადა მამუკა ბახტაძემ.
გუგუტიანთკარში შეხვედრას მთავრობის მეთაურთან ერთად იმყოფებოდნენ პარლამენტის თავმჯდომარე არჩილ თალაკვაძე და სახელმწიფო მინისტრი შერიგებისა და სამოქალაქო თანასწორობის საკითხებში ქეთევან ციხელაშვილი.
მთავრობის პრესსამსახურისგან გუგუთიანთკარში ბახტაძის ჩასვლის შესახებ ცნობა 01:27 საათზე მივიღეთ.
მანამდე კი რადიო თავისუფლების კორესპონდენტი ადგილობრივ მცხოვრებზე დაყრდნობით იუწყებოდა, რომ ბახტაძე სოფელში დაახლოებით 21:30-ზე ჩავიდა და, სავარაუდოდ, იქ 30 წუთი დაჰყო.