ადვოკატი: იულია სუსლიაკი გატაცებულია
„21 ივლისს, დაახლოებით 9 საათისათვის, იულია სუსლიაკი გარდაბნის ტერიტორიაზე დააკავეს პროკურორორების, თეა გიორგაძისა და მარიამ გოგორელიანის უშუალო მითითებითა და ყოველგვარი სამართლებრივი საფუძვლების გარეშე. 22 ივლისს 13.00 საათზე უნდა ჩაგვეტარებინა ბრიფინგი იულია სუსლიაკის მონაწილეობით, სადაც ის აპირებდა ყველაფრის თქმას თავიდან ბოლომდე, ყველა იმ ადამიანის სახელისა და გვარის დასახელებას, რომლებმაც ჩაიდინეს მის წინააღმდეგ დანაშაული. რა პირობებში იყო საპყრობილეში და როგორ ზემოქმედებნენ მასზე. აპირებდა ამ ყველაფერზე საუბარს ჩემთან ერთად. იმისათვის, რომ ეს არ დაეშვათ, გაიტაცეს ადამიანი ყოველგვარი სასამართლოსა და სამართლებრივი საფუძვლის გარეშე“, - უთხრა რაიდიო თავისუფლებას ადვოკატმა ზურაბ თოდუამ, რომლის თქმითაც, იულია სუსლიაკი საქართველოში მოემგზავრებოდა ბაქოდან, სადაც პატიმრობიდან გათავისუფლების შემდეგ ორი დღით იმყოფებოდა.
„პროკურატურაში არ გვეუბნებიან სად არის, არ ვიცითო, ამბობენ, თუმცა ყველაფერი იციან, მათი შეკვეთით არის გაკეთებული“, - ამბობს ადვოკატი.
რადიო თავისუფლებას საქართველოს პროკურატურაში განუცხადეს, რომ „სუსლიაკის საქმე“ სამართლებრივად პროკურატურას აღარ ეკუთვნის.
„უკრაინულ მხარესთან შეთანხმებით, იულია სასულიაკის საქმე გადაიგზავნა უკრაინის გენერალურ პროკურატურაში და ეს საქმე ფაქტობრივად აღარ არის ქართული მხარის იურისდიქციაში“, - უთხრეს რადიო თავისუფლებას პროკურატურის პრეს-სამსახურში.
ქართველმა სამართალდამცავებმა არასრულწლოვნებით ვაჭრობის ბრალდებით უკრაინის მოქალაქე იულია სუსლიაკი 2019 წლის აპრილში დააკავეს. დანაშაული 14-დან 17 წლამდე ვადით თავისუფლების აღკვეთას ითვალისწინებდა. საქართველოში ათ ბავშვთან ერთად ჩამოსული ქალის შესახებ ცნობილი გახდა 19 აპრილს, როცა ბავშვები ინტოქსიკაციის დიაგნოზით აღმოჩნდნენ ჯერ ზუგდიდის, შემდეგ კი ქუთაისის საავადმყოფოში.