Каләмдәшләребез нәни Ильясны сөендерде
Мәгълүм булганча, быел “Әлмәт таңнары” газетасы нәшер ителә башлауга 25 ел булды. Без чирек гасырлык юбилеебызны зурлап, драмтетар бинасы шыгрым тулы газета укучыларыбыз, кунаклар белән билгеләп үттек. Әмма бәйрәм иттек тә, бетте түгел – туган көнебезгә багышланган чаралар бүген дә дәвам итә.
Юбилей кысаларында иң беренче булып безнең хәйрия эстафетасы старт алган иде. Декабрь аенда “Әлмәт таңнары” башлап җибәргән “Сабыйга бәхет бүләк ит!” акциясенә шәһәр һәм районда чыга торган барлык масскүләм мәгълүмат чаралары теләктәшлек белдерде. Декабрь аеннан башлап ай саен бер коллектив авыр хәлдә калган, язмыш тарафыннан кыерсытылган сабыйга ярдәм күрсәтеп һәм эстафетаны бер-берсенә тапшырып килде. Әлеге изге гамәлдә район башлыгының матбугат хезмәте, “Татмедиа” җәмгыятенең “Әлмәт РТВ” телерадиокомпаниясе, “Знамя труда” газетасы, “Луч” телекомпаниясе катнашырга өлгерде инде.
“Әлмәт таңнары” хәйрия акциясен дәвам итеп, узган шимбә көнне шәһәр паркы сәхнәсеннән “Альметьевский вестник” газетасы коллективы да аңа теләп кушылуын белдерде. Гөлчәчәк һәм Равил Сәйфуллиннар язмыш тарафыннан кыерсытылган өч яшьлек уллары Ильяска бүләк һәм матди ярдәм күрсәтүләре өчен рәхмәтләрен җиткерделәр.
Эстафета дәвам итә. Ул ел азагына кадәр бара. Изгелек таягы “Стиль и совершенство” журналы коллективына тапшырылды.