Վրաստանի ՆԳՆ-ն հայտնել է ավելի քան 300 ցուցարարի բերման ենթարկելու մասին
Վրացական ոստիկանությունը տարբեր իրավախախտումների համար հանրահավաքի 305 մասնակցի է բերման ենթարկել, որոնք մասնակցել են երկրի խորհրդարանի շենքի առաջ տեղի ունեցած ցույցին: Ինչպես փոխանցում է Новости-Грузия-ն, այս մասին հայտնել է երկրի ՆԳ նախարարի տեղակալ Վլադիմիր Բորցվաձեն:
Նրա խոսքով՝ ակցիան դուրս է եկել օրենքով սահմանված կանոնակարգի շրջանակներից և «ակնհայտ բռնի բնույթ է կրել: Բորցվաձեն հավելել է, որ չնայած հատուկ միջոցների կիրառմանը՝ ակցիայի մասնակիցների ագրեսիվ հատվածը շարունակել է խախտել օրենքը ողջ գիշերվա ընթացքում:
«Լուսաբացին նրանք ոչնչացրել են ոստիկանների և քաղաքացիների մեքենաները, վնաս հասցրել մոտակայքում գտնվող մասնավոր կառույցներին»,- նշել է Բորցվաձեն:
Հինգշաբթի տեղի ունեցած լայնածավալ հակակառավարական ակցիայի ժամանակ Վրաստանի ՆԳՆ-ն արցունքաբեր գազ և ռետինե փամփուշտներ է կիրառել ցուցարարների դեմ, որոնք փորձել են ներխուժել խորհրդարանի շենք: Նշվում է, որ հատուկջոկատայինների հետ բախումների ժամանակ տուժած 240 մարդկանցից 102-ը դեռևս գտնվում են հիվանդանոցներում: Տուժածների թվում 80 ոստիկան է եղել: