შსს განცხადებას ავრცელებს
„როგორც საზოგადოებამ იხილა, პარლამენტის წინ შეკრებილი აქციის მონაწილეთა პროტესტი გასცდა გამოხატვის თავისუფლების და მშვიდობიანი შეკრების კანონით დადგენილ ფარგლებს და მიიღო ძალადობრივი ხასიათი.
მიუხედავად სამინისტროს მხრიდან მოწოდებისა, აქციის მონაწილეები განაგრძობდნენ პარლამენტში შეჭრის მცდელობას, პოლიციის მიმართ წინააღმდეგობას და ძალადობას და მათი კანონიერი მოთხოვნისადმი დაუმორჩილებლობას.
შესაბამისად, პარლამენტის შენობაში შეჭრის, მოქალაქეთა და პოლიციელთა ჯანმრთელობის დაზიანების და ფიზიკური დაპირისპირების თავიდან ასაცილებლად, პოლიციამ გამოიყენა კანონით გათვალისწინებული იძულების პროპორციული სპეციალური საშუალებები.
ამასთან, შინაგან საქმეთა სამინისტრო შესაბამის სამართლებრივ შეფასებას მისცემს მასობრივი არეულობის მოწყობისა და პარალამენტის შენობაში შეჭრის მცდელობას. სამართალდარღევის და დანაშაულის თითოეულ ფაქტზე სამინისტორს მოახდენს რეაგირებას“, - წერია შს სამინისტროს მიერ გავრცელებულ განცხადებაში.
რამდენიმე საათია დაძაბული ვითარებაა პარლამენტის შენობის წინ. საპროტესტო აქციის მონაწილეები შს მინისტრის, სახელმწიფო უსაფრთხოების სამსახურის ხელმძღვანელისა და პარლამენტის თავმჯდომარის გადადგომას მოითხოვენ.
ოფიციალური ინფორმაცია დაშავებულთა შესახებ ჯერჯერობით არ ვრცელდება,.
არაოფიციალური ინფორმაციით, დაშავებულია რამდენიმე ათეული ადამიანი. ისინი სხვადასხვა საავადმყოფოში არიან გადაყვანილნი.